I do agree with the analyst about the worse trauma of Cambodian people. The past brutality and civil war have clearly exacerbated this trauma. Recent tradegy of Koh Pich has been certainly worsened this trauma. How could we heal this trauma? I would like to hear more from all of you.
Click to listen:
សំណុំរឿង ស្ពានពេជ្រត្រូវបានអាជ្ញាធរប្រកាសបិទបញ្ចប់ទាំងស្រុងហើយ នៅដើមសប្តាហ៍នេះ។ ប៉ុន្តែវិបត្តិផ្លូវចិត្តរបស់អ្នករងរបួស នៅក្នុងហេតុការណ៍ ជាពិសេសរបស់ក្រុមគ្រួសារអ្នកស្លាប់មិនបានបិទបញ្ចប់ជាមួយសំណុំរឿង នេះទេ។ ពួកគេនឹងរស់នៅជាមួយសម្ពាធផ្លូវចិត្តដ៏ធ្ងន់ធ្ងរមួយ ដែលមិនដឹងថ្ងៃណា បានរសាយឡើយ។ នេះជាសម្ពាធផ្លូវចិត្ត ថ្មីមួយទៀត បន្ថែមពីលើរបួសផ្លូវចិត្តដ៏ធ្ងន់ធ្ងរ ដែលគ្រួសារខ្មែរទទួលរងក្នុងសម័យសង្គ្រាម និងជាពិសេសក្នុងរបបខ្មែរក្រហម។ តើពលរដ្ឋខ្មែរបានទទួលរងវិបត្តិផ្លូវចិត្តអ្វីខ្លះ? តើវិបត្តិទាំងនោះបង្កផលវិបាកបែបណាដល់សង្គម?
ឧបទ្ទវហេតុនៅលើស្ពានពេជ្រ កាលពីរាត្រី២២វិច្ឆិកាដែលបានឆក់យកជីវិតមនុស្ស ៣៥១នាក់ គឺជាមហាសោកនាដកម្មដ៏គួរឲ្យតក់ស្លុតថ្មីមួយទៀត ដែលធ្វើឲ្យអារម្មណ៍គ្រួសារខ្មែរជាច្រើន ដិតដាមដោយក្តីរន្ធត់ញាប់ញ័រ។
មហាសោកនាដកម្មមួយនេះបានបន្សល់ទុកនូវវិបត្តិផ្លូវចិត្តដ៏ធ្ងន់ធ្ងរ ជាពិសេសសម្រាប់អ្នកដែលស្ថិតនៅក្នុងហេតុការណ៍ និងគ្រួសារអ្នកដែលបានស្លាប់យ៉ាងអាណោចអាធម័ ក្នុងព្រឹត្តិការណ៍ដែលមិនគួរនឹងកើតមានទាល់តែសោះនេះ។ អ្វីដែលធ្ងន់ធ្ងរបំផុត គឺមានគ្រួសារខ្លះបានបាត់បង់សមាជិកដល់ទៅ៣ ឬ៤នាក់ ក្នុងពេលដំណាលគ្នា។ តើពួកគេទទួលការប៉ះទង្គិចអារម្មណ៍បែបណាពីមហាសោកនាដកម្មនេះ? នេះគឺជាសំណួរដែលអាចបញ្ជាក់បានអំពីទំហំវិបត្តិផ្លូវចិត្តដែល គ្រួសារខ្មែរទាំងនោះកំពុងទទួលរង។
|
ក្តីរន្ធត់តក់ស្លុតទាំងនេះហើយដែលបង្កើតជាវិបត្តិផ្លូវចិត្ត ដ៏ធ្ងន់ធ្ងរសម្រាប់គ្រួសារខ្មែរគ្រប់គ្នា ដែលគ្មានអ្នកណាគេចផុត។ ទិដ្ឋភាពនេះ បានតាមលងអារម្មណ៍ខ្មែរគ្រប់ពេល និងបានធ្វើឲ្យខ្មែរជាច្រើនរស់ ក្នុងសភាពបាក់ស្បាតជាប្រចាំ។
បច្ចុប្បន្ន ពលរដ្ឋខ្មែរបានរកឃើញស្នាមញញឹមឡើងវិញហើយ ក្រោយពីប្រទេសជាតិមានសន្តិភាព។ ប៉ុន្តែ បញ្ហាជាច្រើននៅតែបន្តបង្កើតជាសម្ពាធផ្លូវចិត្តដល់ពលរដ្ឋដ៏ អភ័ព្វនេះ។ បញ្ហានៅក្នុងសម័យថ្មីនេះមានដូចជា អំពើហិង្សាក្នុងគ្រួសារ អយុត្តិធម៌សង្គម និងភាពក្រីក្រ។ល។និង។ល។ បានបន្តដាក់សម្ពាធផ្លូវចិត្តថែមមួយកម្រិតទៀតទៅលើរបួសផ្លូវចិត្ត ដែលកំពុងមានស្រាប់ទៅហើយនោះ។
នៅមិនទាន់មានការសិក្សាណាមួយឲ្យបានស៊ីជម្រៅ ទៅលើទំហំនៃវិបត្តិផ្លូវចិត្ត នៅក្នុងសង្គមខ្មែរនៅឡើយទេ ប៉ុន្តែ បើយោងតាមក្រុមគ្រូពេទ្យឯកទេស ជំងឺផ្លូវចិត្តមានសភាពន់ធ្ងរណាស់សម្រាប់សង្គមកម្ពុជា។ ថ្វីត្បិតតែវិបត្តិនេះហាក់ដូចជាមិនសូវមើលឃើញ ប៉ុន្តែ វាបាន និងកំពុងរាត្បាត និងស៊ីរូងសង្គមខ្មែរដោយស្ងៀមស្ងាត់បំផុត។
ជាផលវិបាកជាក់ស្តែង មនុស្សខ្មែរជាច្រើនរស់នៅក្នុងសភាពខ្ទេចខ្ទាំខាងស្មារតី និងបាក់ស្បាតដែលធ្វើឲ្យពួកគេងាយនឹងតក់ស្លុត នៅចំពោះមុខស្ថានភាពភយន្តរាយណាមួយ។ ការឆាប់ជឿលើអបិយជំនឿផ្តេសផ្តាសទាក់ទងនឹងសេចក្តីស្លាប់ដែលជា ចរន្តកំពុងកើតឡើងពាសពេញផ្ទៃប្រទេស ដូចជាពេលបច្ចុប្បន្ននេះ គឺជាឧទាហរណ៍ជាក់ស្តែងមួយ។ អំពើហិង្សា ឧក្រិដ្ឋកម្ម ឃាតកម្ម និងអាកប្បកិរិយាមិនគោរពច្បាប់ ជាដើម ក៏អាចមានប្ញសគល់ចេញពីស្ថានភាពខ្ទេចខ្ទាំខាងស្មារតីរបស់ពលរដ្ឋ នេះដែរ។
ធ្ងន់ធ្ងរជាងនេះទៅទៀត ពលរដ្ឋខ្មែរជាច្រើនរស់ក្នុងសភាពវិលវល់ ដូចជាមនុស្សគ្មានព្រលឹងព្រលះក្នុងខ្លួន ដែលមិនអនុញ្ញាតឲ្យពួកគេកសាងសង្គមគ្រួសារឲ្យបានល្អបានឡើយ។ នេះក៏ជាមូលហេតុមួយនៃភាពក្រីក្រក្នុងសង្គមផងដែរ។
សរុបមកវិញ ពលរដ្ឋខ្មែរទទួលរងការប៉ះទង្គិចផ្លូវចិត្តយ៉ាងដំណំ ពីរបបសង្គមដែលខ្លួនរស់នៅ។ ទោះបីជាបច្ចុប្បន្ន សង្គមកម្ពុជាបានស្គាល់សន្តិភាពក៏មែនពិត ប៉ុន្តែ មានបញ្ហាជាច្រើន នៅតែបង្កជាបន្ទុកបន្ថែមទៅលើរបួសផ្លូវចិត្តដែលមានស្រាប់។ សង្គមមួយដែលមានកោសិកាជាពលរដ្ឋទទួលរងរបួសផ្លូវចិត្តដ៏ធ្ងន់ធ្ងរ បែបនេះពិតជាមិនងាយនឹងស្តារឡើយ។
ដូច្នេះ ការព្យាបាលរបួសផ្លូវចិត្តនៃពលរដ្ឋរបស់ខ្លួន គឺជាបេសកកម្មចម្បងរបស់រដ្ឋាភិបាល។ យ៉ាងហោចណាស់ ការទប់ស្កាត់មិនឲ្យមានការប៉ះទង្គិចអារម្មណ៍ថ្មីទៀត ក៏អាចចាត់ទុកជាការចូលរួមចំណែកដ៏ធំធេងក្នុងការព្យាបាលរបួស ផ្លូវចិត្តនេះដែរ៕
No comments:
Post a Comment