នៅពេលដែលយុវវ័យជាច្រើនកំពុងឈ្លក់វង្វេងនឹងវប្បធម៌បរទេស ខ្លះទៀតកំពុងភ្លើតភ្លើននឹងវប្បធម៌ពាលាជាច្រើនទៅតាមសម័យ សម្ភារនិយមនោះ ការអប់រំតាមបែបព្រះពុទ្ធសាសនាពិតជាដើរតួនាទីយ៉ាងសំខាន់ក្នុង ការតម្រង់ទិសពួកគេ។ ដោយមានការគាំទ្រពីក្រសួងធម្មការនិងកិច្ចការសាសនា សមាគមមួយដែលដឹកនាំដោយព្រះសង្ឃ បានចុះអប់រំសិស្សសាលាដោយប្រើប្រាស់ទស្សនវិជ្ជាបែបព្រះពុទ្ធសាសនា។ តាមរយៈកម្មវិធីនេះ សិស្សសាលាជាច្រើនបានត្រងត្រាប់រហូតដល់ទប់ទឹកភ្នែកមិនបាននៅពេល ដែលព្រះសង្ឃសម្តែងអំពីគុណរបស់ឳពុកម្តាយ។ នេះសបញ្ជាក់ថា ព្រះពុទ្ធសាសនានៅតែមានតម្លៃសម្រាប់ការអប់រំដែលគេគួរតែប្រើប្រាស់ សម្រាប់តម្រង់ទិសសង្គម។
ទឹកភ្នែកបានរមៀលចុះកាត់ផែនថ្ពាល់របស់សិស្សានុសិស្សស្ទើរ គ្រប់គ្នានៅរាល់ពេលដែលពួកគេបានស្មិងស្មាធិ៍ត្រងត្រាប់ស្តាប់ ដំបូន្មានរបស់ព្រះសង្ឃអំពីគុណមាតាបិតា និងគុណគ្រូ ដែលបានបង្កើត ចិញ្ចឹមបីបាច់ និងផ្តល់ចំណេះវិជ្ជាដល់ពួកគេ។ ទឹកភ្នែកទាំងនោះបានសបញ្ជាក់ឲ្យឃើញថា ពួកគេអាចទទួលយកយ៉ាងល្អនូវដំបូន្មានដែលសម្តែងដោយព្រះសង្ឃតាមបែប ទស្សនវិជ្ជាព្រះពុទ្ធសាសនា។ គំនិតផ្តួចផ្តើមឲ្យមានកម្មវិធីអប់រំតាមទស្សនវិជ្ជាព្រះពុទ្ធសាសនា នៅក្នុងសាលាពិតជាមានសារៈសំខាន់ខ្លាំងណាស់ក្នុងការជួយតម្រង់ទិស យុវវ័យដែលកំពុងឈ្លក់វក់វីនឹងវប្បធម៌បរទេស និងវប្បធម៌ពាលាជាច្រើនទៀតក្នុងបរិបទនៃសាកលភាវូបនីយកម្មគ្មាន ព្រំដែនដូចជាពេលបច្ចុប្បន្ននេះ។
ជាការពិតណាស់ បច្ចុប្បន្ននេះ មនុស្សភាគច្រើន ជាពិសេសក្នុងចំណោមយុវវ័យតែម្តងកំពុងរត់ប្រណាំងគ្នាខាងសម្ភារនិយម និងភាពជឿនលឿនហួសបែបបទមួយចំនួន ដោយទុកចោលមួយឡែកនូវសីលធម៌ និងគុណធម៌ដ៏មានតម្លៃរបស់សង្គម។ ភាពជាក្មេងទំនើងដែល កាប់ចាក់គ្នាគ្រាន់តែរឿងបន្តិចបន្តួច ការសេពគ្រឿងញៀន គ្រឿងស្រវឹង ការឈ្លក់វក់វីនឹងល្បែងស្នេហាខុសប្រពៃណី និងការស្រើបស្រាលជាមួយនឹងសម្ភារនិយមជាដើម កំពុងតែវាយលុកយ៉ាងពេញទំហឹងទៅលើយុវវ័យសម័យកំព្យូទ័រ។
នៅក្នុងបរិបទនេះ ការអប់រំតាមទស្សនវិជ្ជាព្រះពុទ្ធសាសនាគឺជាឱសថដ៏ស័ក្តិសិទ្ធិមួយ ដើម្បីព្យាបាលជំងឺឈ្លក់វង្វេងរបស់យុវវ័យ។ ជាទូទៅ នៅពេលនិយាយពីព្រះពុទ្ធសាសនា គេច្រើនតែនាំគ្នាគិតដល់មនុស្សចាស់ពោលគឺ ព្រះសង្ឃហាក់ដូចជាអាចជួយតម្រង់ទិសបានតែមនុស្សចាស់ ដោយបំភ្លេចយុវវ័យចោលទាំងស្រុង។ ប៉ុន្តែ តាមពិតវាមិនមែនដូច្នោះទេ ជាក់ស្តែងអ្វីដែលព្រះសង្ឃបាននិងកំពុងធ្វើជាមួយសិស្សសាលានៅពេល នេះបានបង្ហាញយ៉ាងច្បាស់ថា ព្រះសង្ឃក៏មានឥទ្ធិពលខ្លាំងណាស់ដែរទៅលើស្រទាប់យុវវ័យ ប្រសិនបើការសម្តែងធម៌នោះមានលក្ខណៈសមស្របទៅនឹងការអប់រំផ្លូវ ចិត្តរបស់ពួកគេ។ និយាយតាមបែបផ្សេង ឱសថមានតម្លៃមាននៅគ្រប់ទិសទីក្នុងសង្គមខ្មែរយើង ប៉ុន្តែ បញ្ហានៅត្រង់ថា យើងមិនចេះប្រើប្រាស់ឬកែច្នៃវាឲ្យមានប្រយោជន៍សម្រាប់ព្យាបាល ជំងឺសង្គមរបស់យើងតែប៉ុណ្ណោះ។
ទស្សនវិជ្ជាដ៏មានតម្លៃមួយដែលបង្កប់នៅក្នុងធម៌របស់ព្រះពុទ្ធគឺនៅ ត្រង់ការអប់រំផ្លូវចិត្តឲ្យស្ងប់ វៀរចាកពីការលោភលន់ និងអំពើអសីលធម៌ផ្សេងៗ។ ទស្សនវិជ្ជានេះហើយដែលអាចយកឈ្នះលើភាពស្រើបស្រាលក្នុងសម័យ សម្ភារនិយមដូចបច្ចុប្បន្ននេះបាន។ អ្វីដែលគួរពិចារណានោះគឺ តើគេគួរបណ្តោយឲ្យសង្គមទទួលរងការវាយលុកពីសាកលភាវូបនីយកម្មទៅ តាមយថាកម្មរបស់វាដោយមិនខ្ចីរវីរវល់អ្វីទាំងអស់ ឬក៏គួរនាំគ្នាលាត់ដៃអាវ មូរជើងខោដើម្បីតម្រង់ទិសសង្គមរបស់យើងឲ្យឆ្ពោះទៅរកគោលដៅមួយ ច្បាស់លាស់?
និយាយពីការអប់រំតាមទស្សនវិជ្ជាព្រះពុទ្ធសាសនា គេក៏មិនត្រូវភ្លេចដែរថា ការពង្រឹងវិន័យក្នុងចំណោមសហគមន៍សង្ឃក៏ជាការចាំបាច់ខ្លាំងណាស់ ដែរពីព្រោះការប្រព្រឹត្តមិនល្អរបស់បុគ្គលសង្ឃមួយចំនួនបាននិង កំពុងជះឥទ្ធិពលអាក្រក់ខ្លាំងណាស់ដល់តម្លៃនៃព្រះពុទ្ធសាសនា។ ចូរកុំភ្លេចថា បុគ្គលដែលអាចដើរតួជាអ្នកអប់រំគេប្រកបដោយប្រសិទ្ធិភាព ទាល់តែជាបុគ្គលដែលជាទីគោរពរបស់អ្នកផងទាំងពួង។ នៅកម្ពុជាទីណាក៏មានវត្តអារាម និងមានព្រះសង្ឃដែរ ដូច្នេះ វាមិនជាការពិបាកឡើយក្នុងការបញ្ចូលការអប់រំផ្លូវចិត្តតាមបែប ព្រះពុទ្ធសាសនាទៅក្នុងសាលាឲ្យបានព្រមៗគ្នានៅទូទាំងប្រទេសនោះ។ នៅពេលដែលយុវវ័យទទួលយកការអប់រំបែបនេះកាន់តែច្រើន ពួកគេនឹងបានស្ងប់ចិត្ត ស្គាល់គុណ ស្គាល់ទោស និងឈប់ប្រព្រឹត្តអំពើមិនគួរគប្បីទៀតជាមិនខានឡើយ៕
No comments:
Post a Comment